سیہ بختی میں کب کوئی کسی کا ساتھ دیتا ہے

کہ تاریکی میں سایہ بھی جدا انساں سے رہتا ہے

دردِ دل کے واسطے پیدا کیا انسان کو

ورنہ طاعت کے لئے کچھ کم نہ تھے کروبیاں

دل سیاہ ہے ، بال سب اپنے پیری میں سفید

گھر کے اندر ہے اندھیرا اور باہر چاندنی

خواب ہی میں نظر آ جائے شبِ ہجر کہیں

سو مجھے حسرتِ دیدار نے سونے نہ دیا

ہم مے کشوں کو ڈر نہیں مرنے کا محتسب!

فردوس میں بھی سنتے ہیں نہرِ شراب ہے

زاہد وہ بادہ کش ہوں کہ مانگوں اگر دعا

اٹھیں ابھی شراب سے بادل بھرے ہوئے

تمام عمر یوں ہی ہو گئی بسر اپنی

شبِ فراق گئی روزِ انتظار آیا